Kremlini tha të premten se ishte i hapur për të folur për një shkëmbim të mundshëm të të burgosurve që përfshin yllin amerikan të basketbollit të femrave, Brittney Griner, por paralajmëroi fuqishëm Washingtonin që të mos e bëjë publike këtë çështje, ka raportuar AP. Griner, kampione olimpike e SHBA-së dhe kampione me Phoenix Mercury në WNBA, është arrestuar në Rusi që nga 17 shkurti pasi policia në Aeroportin e Moskës tha se gjeti cigare elektronike që përmbanin vaj kanabisi në bagazhin e saj.
Një gjykatëse e dënoi 31-vjeçaren të enjten për posedim dhe kontrabandë droge me nëntë vjet burgim. Rasti i akuzuar politikisht vjen në mes të tensioneve të larta midis Moskës dhe Washingtonit mbi aksionin ushtarak të Rusisë në Ukrainë.
Në një veprim të jashtëzakonshëm, sekretari amerikan i shtetit, Antony Blinken, foli javën e kaluar me ministrin e Jashtëm rus, Sergey Lavrov, duke i kërkuar atij që të pranonte një marrëveshje sipas së cilës Griner dhe Paul Whelan, një amerikan i burgosur në Rusi për akuzat e spiunazhit, do të liroheshin. Lavrov dhe Blinken ishin të dy në Kamboxhia të premten për një takim të Shoqatës së Kombeve të Azisë Juglindore.
Blinken as nuk i hodhi një sy homologut të tij rus, ndërsa ata zunë vendet e tyre në një Samit të Azisë Lindore. Lavrov u tha gazetarëve se Blinkeni nuk u përpoq të kontaktonte me të, ndërsa ata po merrnin pjesë në takim. Lavrov tha se Moska ishte “gati të diskutonte” një shkëmbim të të burgosurve, porse tema duhet të diskutohet vetëm përmes një marrëveshjeje të përkushtuar Rusi-SHBA.
“Nëse amerikanët përsëri përpiqen të angazhohen në diplomacinë publike dhe të bëjnë deklarata me zë të lartë për qëllimin e tyre për të ndërmarrë hapa të caktuar, ky është do të thosha problemi i tyre”, tha Lavrov. “Amerikanët shpesh e kanë të vështirë t’i respektojnë marrëveshjet për punën e qetë dhe profesionale”.
Në Moskë, zëdhënësi i Kremlinit, Dmitry Peskov, e bëri të njëjtën gjë duke thënë se “SHBA-ja tashmë ka bërë gabime, duke u përpjekur t’i zgjidhë probleme të tilla nëpërmjet ‘diplomacisë së mikrofonit’. Ato nuk zgjidhen në këtë mënyrë”.
Ai gjithashtu theksoi se çdo diskutim mbi një shkëmbim të mundshëm duhet të bëhet përmes kanaleve konfidenciale të krijuara më parë për të cilat Vladimir Putini dhe Joe Biden ranë dakord gjatë samitit të vitit të kaluar.
“Nëse ne diskutojmë ndonjë nuancë në lidhje me çështjen e shkëmbimit përmes mediave, asnjë shkëmbim nuk do të bëhet kurrë”, insistoi Peskov.
Njerëz të njohur me propozimin e SHBA-së kanë thënë se ai parashikon shkëmbimin e Grinerit dhe Whelanit me një tregtar famëkeq rus të armëve, Viktor Bout. Ai po vuan një dënim 25-vjeçar në SHBA pasi u dënua për komplot për të vrarë qytetarët amerikanë dhe për të ofruar ndihmë për një organizatë terroriste.
Thirrja midis Blinkenit dhe Lavrovit shënoi kontaktin e nivelit më të lartë të njohur midis Washingtonit dhe Moskës qëkur Rusia dërgoi trupa në Ukrainë më shumë se pesë muaj më parë, duke nënvizuar presionin publik me të cilin është përballur Shtëpia e Bardhë për të liruar Grinerin. Griner u arrestua teksa po kthehej për të luajtur për një ekip në Rusi, ku ka garuar që nga viti 2014. Blinkeni tha të premten se dënimi i saj “përkeqëson padrejtësinë që i është bërë”.
“Ai vë në qendër të vëmendjes shqetësimin tonë shumë domethënës me sistemin ligjor të Rusisë dhe përdorimin e ndalimeve të gabuara nga Qeveria ruse për të çuar përpara agjendën e saj duke përdorur individë si pengje politikë”, tha ai.
Të enjten, Bideni denoncoi vendimin dhe dënimin e gjykatëses ruse si “të papranueshëm” dhe tha se do të vazhdojë të punojë për të sjellë Grinerin dhe Whelanin në shtëpi.
