Kryeministri i Kosovës, Albin Kurti ka shkruar për nëntë mujorin e marrjes së detyrës së shefit të qeverisë, duke thënë se si qeveri, nuk harrojnë dot qëllimin e rrugëtimit që kanë filluar nga 14 shkurti, raporton Gazeta Enigma.
Kurti tha se pandemia e ka rënduar supet e secilit qytetarë, derisa theksoi se edhe shumë prej tyre janë harruar nga politika.
“Po përfundon një vit sfidues për të gjithë ne. Pandemia ka rënduar mbi supet e secilit prej nesh. E derisa mbyllim këtë vit me shumë arritje në shumë sektor, kujtojmë që për shumë qytetarë të cilët me dekada janë harruar nga politika, jeta mbetet ende e vështirë. Prandaj edhe nuk harrojmë dot arsyen se përse ne jemi këtu”, ka shkruar Kurti në një postim në Facebook.
“Ndonëse ndodhemi në një krizë të vështirë energjetike globale, do të bëjmë gjithë çka mundemi e krejt çka dimë të dalim me sa më pak humbje e dëme prej saj”.
“Një vit i ri e një dekadë e re shtrihet para nesh. Le të shtyjmë vetën përpara duke u bërë shembull për fëmijët tanë. Qeveria që kemi zgjedhur nuk heq dorë nga suksesi. Unë nuk heq dorë nga ndryshimi të cilin e kemi filluar”, u shpreh kryeministri.
“E ardhmja jonë është e ndritshme e rrugëtimi ynë është i përbashkët”, përfundoi Kurti. /Gazeta Enigma/.
