Ministri në detyrë i Mbrojtjes, Ejup Maqedonci, ka shprehur shqetësimin se grupi që organizoi sulmin terrorist në Banjskë, e të cilët tani enden të lirë nëpër Serbi, shpesh po ofrohen në kufirin me Kosovën.
Maqedonci tha se ky grup vazhdon të mbrohet dhe mbështetet nga struktura të sigurisë në Serbi, shpesh duke u vendosur jo larg kufirit me Kosovën dhe duke pasur lidhje të vazhdueshme me individë dhe grupe në veri të vendit.
Sipas tij, kjo paraqet një rrezik të vazhdueshëm për sigurinë e Kosovës, sidomos në pjesën veriore.
Maqedonci gjithashtu theksoi se Serbia ka obligime ndërkombëtare për t’i dorëzuar terroristët që kanë kryer krime në Kosovë.
“Përpjekjet e Serbisë për të vazhduar politikën hegjemoniste ndaj Kosovës, duke mohuar ekzistencën e shtetit të Kosovës dhe duke kontribuar në destabilizimin e rajonit, janë të papranueshme”, deklaroi Maqedonci.
