Mosmarrëveshjet për motive të ndryshme, e që shpeshherë dalin të jenë banale bëhen mollë sherri e kërcënimeve e përleshjeve mes të rinjve në vendin tonë. Për pasojë, konfliktet jo rrallëherë eskalojnë edhe në rrahje brutale, ku përdoren edhe mjetet e mprehta.
Në të tilla raste shpesh përfshihen edhe të miturit.
Një rast i tillë ka ndodhur edhe të hënën në fshatin Slivovë të Prishtinës, ku dy të mitur, njëri 13 e tjetri 15 vjeç, janë përfshirë në një përleshje për motive akoma të panjohura.
Siç mëson Sinjali nga burimet brenda Emergjencës, 15-vjeçari është dërguar në këtë qendër me plagë si pasojë e therjes me thikë, teksa i mituri tjetër ka pësuar lëndime nga sulmi me boks hekuri.
Gjendja shëndetësore e të miturve është stabile dhe të njëjtit janë intervistuar, në prani të prindërve, lidhur me rastin për të cilin dyshohen.
Ndërkohë, njësitet policore kanë kryer ekzaminimet e nevojshme në vendin e ngjarjes.
Pas përfundimit të procedurave policore, Prokurori i Shtetit ka urdhëruar që të iniciohet hetim për këtë rast, ndërsa dy të miturit janë lënë të lirë.
