Presidenti i Rusisë, Vladimir Putin, ka paralajmëruar ashpër NATO-n, kundër vendosjes së trupave dhe armëve të saj në Ukrainë, duke thënë se ajo përfaqëson një vijë të kuqe për Rusinë dhe do të shkaktonte një përgjigje të fortë.
Duke komentuar shqetësimet perëndimore rreth synimit të supozuar të Rusisë për të pushtuar Ukrainën, Putin tha se Moska është po e shqetësuar për stërvitjet e NATO-s pranë kufijve të saj, shkruan Associated Press, transmeton Gazeta Sinjali.
Putin tha se zgjerimi i NATO-s drejt lindjes ka kërcënuar interesat kryesore të sigurisë së Rusisë, e u shpreh i shqetësuar se NATO mund të përdorë përfundimisht territorin ukrainas për të vendosur raketa të afta të arrijnë Moskën në vetëm pesë minuta.
“Shfaqja e kërcënimeve të tilla përfaqëson një “vijë të kuqe” për ne, shpresoj se nuk do të arrihet deri tek mendja e shëndoshë dhe përgjegjësia për vendet e tyre dhe komunitetin global përfundimisht do të mbizotërojë”, është shprehur Putini.
Ai shtoi se Rusia është detyruar të kundërshtojë kërcënimet në rritje duke zhvilluar armë të reja hipersonike.
Ai tha se një raketë e re hipersonike që do të hyjë në shërbim me marinën ruse në fillim të vitit të ardhshëm dhe do të jetë në gjendje të arrijë objektivat në kohë të krahasueshme.
Zyrtarët ukrainas dhe perëndimorë kanë shprehur shqetësime këtë muaj se një grumbullim ushtarak rus pranë Ukrainës mund të sinjalizojë planet e Moskës për të pushtuar fqinjin e saj ish-sovjetik. Ministrat e jashtëm të NATO-s paralajmëruan Rusinë sot, se çdo përpjekje për të destabilizuar më tej Ukrainën do të ishte një gabim i kushtueshëm.
Kremlini ka këmbëngulur se nuk ka një qëllim të tillë dhe ka akuzuar Ukrainën dhe mbështetësit e saj perëndimorë se kanë bërë pretendime për të mbuluar planet e tyre të supozuara agresive.
Putin argumentoi se për të shmangur tensionet, Rusia dhe Perëndimi duhet të negociojnë marrëveshje që do të ruanin interesat e sigurisë së secilës palë.
Udhëheqësi rus vuri në dukje se Rusia është shqetësuar për stërvitjet e NATO-s pranë kufijve të saj, duke vënë në dukje një stërvitje të fundit që përfshin bombarduesit strategjikë amerikanë.
Pas grumbullimit të trupave ruse pranë Ukrainës në fillim të këtij viti, Putin dhe Presidenti i SHBA-së, Joe Biden, mbajtën një samit të qershorit në Gjenevë, ku ranë dakord të nisin një dialog mbi stabilitetin strategjik dhe sigurinë kibernetike.
Putin sot, përshëndeti diskutimet për sigurinë kibernetike midis ekspertëve rusë dhe amerikanë, duke thënë “ashtu si me pandeminë, është e nevojshme të bashkohen përpjekjet për të punuar me efikasitet”.
Edhe pse Putin nuk ka vendosur ende nëse do të kërkojë një mandat tjetër përpara se ai aktual të përfundojë në 2024, ai tha se mundësia e qëndrimit të tij ka ndihmuar stabilitetin e Rusisë.
