Barcelona ishte dy herë në epërsi. Por në fund mbeti pa pikë dhe kështu Real Madridi mund të bëhet gati për festën e madhe për titull të kampionit në La Liga.
Real Madridi fitoi 3:2 “El Clasicon” e së dielës mbrëma, që u zhvillua në “Santiago Bernabue”.
Gjashtë xhiro para fundit, Real Madridi udhëheqë në tabelë me 81 pikë. Barcelona i ka 70 pikë. Pra Reali është tashmë i paarritshëm.
Klasikja e fundit e këtij edicioni i takoi xhiros së 32-të të kampionatit spanjoll. Dhe ishte e denjë për emrin që e mbanë. Dy skuadrat kanë ofruar ndeshje të madhe e momente dramatike. Në fund festuan madrilenët.
Andreas Christensen kaloi në epërsi 1:0 Barcelonën në minutën e gjashtë. Vinicius Junior barazoi rezultatin në 1:1 në minutën e 18-të, me golin nga penalltia.
Fermin Lopez shënoi sërish për Barcelonën në minutën e 69-të. Menjëherë në minutën e 73-të, Lucas Vazquez barazoi në 2:2.
Në minutat shtesë, përkatësisht në minutën e 92-të, në skenë doli Jude Bellingham që shënoi golin e fitores së madhe, 3:2.
