Zëvendësministri i Financave, Punës dhe Transfereve, Ilir Kapiti, ka thënë se Qeveria e Kosovës është e përkushtuar për krijimin e mekanizmave për rritjen e sigurisë dhe shëndetit në punë, si dhe mbrojtjen e të drejtave të punëtorëve.
“Për të parandaluar rreziqet në punë, masat e para janë shtimi i numrit të inspektorëve, ngritja e kapaciteteve për trajtimin e ankesave të punëtorëve dhe ligji për lehonat”, tha ai.
Këto komente i bëri ai gjatë publikimit të profilit të shëndetit dhe sigurisë në punë nga organizata International Labour Organization, ku u tha se është diskriminuese, që rreth 7 mijë punëtorë në vend marrin paga nga 80 euro.
Kryeinspektori i Inspektoratit të Punës, Ekrem Kastrati, tha se dy objektivat e tyre janë siguria dhe shëndeti punë, si dhe luftimi i informalitetit.
Ai tha se numri i aksidenteve me fatalitet në punë është në rënie, derisa shtoi se mirëpresin idenë e qeverisë për rritjen e numrit të inspektorëve.
“Jemi të përkushtuat që objektivat tona t’i çojmë përpara dhe ky dokument i organizatës së punës do të na ndihmojë shumë. Prandaj, jemi të përkushtuar dhe së bashku gjatë kësaj periudhe do t’ia dalim. Aksidentet në punë me fatalitet janë në rënie dhe besojmë që mekanzimat tona që t’i parandalojmë aksidentet në punë”, tha Kastrati.
