Loret Sadiku ka dy muaj që është jashtë fushës pas simptomave shqetësuese post-Covid. Por këtë fundjavë, ai do të rikthehet në derbin kundër Djurgardenit të dielën. Sadiku 31-vjeçar ka zhvilluar stërvitje me grupin gjatë tërë javës dhe është i gatshëm për ta ndihmuar ekipin e tij suedez, Hammarby.
“Ai po bëhet gjithnjë e më mirë. Pra, ai është dyshim një opsion për skuadrën dhe për kohën e lojës. Disa lojtarë, kur janë jashtë fushës për një kohë të gjatë, kanë nevojë më të madhe për ta kapur ritmin e ndeshjeve në trupin e tyre. Por, Loreti dallon. Ai ka një kapacitet më të lartë sportiv. Do të shohim a do të luajë nga fillimi apo jo. Por, ai padyshim është një opsion”, ka thënë trajneri Martin Cifuentes.
Sadiku u prek nga koronavirusi rreth dy muaj më parë dhe më pas pati probleme për një kohë të gjatë.
“Unë u infektova me koronavirusi dhe më pas isha i shtrirë në shtrat. Ka qenë shumë e lodhshme, nuk kam pasur energji dhe kam qëndruar i sëmurë gjatë gjithë kohës”, thotë Sadiku.
Ai ka treguar se në shtrat ka qëndruar dy javë të plota.
“Plotësisht dy javë në shtrat. Pastaj u ktheva pak, u përpoqa të stërvitesha, por pata një pengesë. Pastaj u lodha edhe më shumë. Por, për rreth dy javë isha i shtrirë në shtrat”, ka thënë ai.
Sadiku, i cili u vaksinua me tri doza, nuk e di plotësisht pse ndodhi ashtu siç ndodhi.
“Është e vështirë të përgjigjem. Një ditë thua atë, një ditë thua tjetrën. Vështirë të thuhet dhe nuk është diçka për të cilën mendoj”, ka theksuar ish-mbrojtësi i Kosovës dhe Shpresave të Suedisë.
Se a është 100 % i gatshëm të paraqitet në derbi e thotë vetë lojtari.
“Fizikisht jam shumë mirë. Unë nuk kam luajtur për një kohë të gjatë, por jam mirë. Nuk kam humbur shumë anën fizike, por janë kryesisht muskujt. Tani ndihem shumë mirë. Kam punuar shumë për t’u kthyer. Në fillim kur u ktheva vetëm ecja nëpër fushë, tani jam me të gjithë ekipin”, ka thënë Sadiku. Ai këtë edicion ka kontribuuar me një asistim në 12 ndeshje në kampionatin elitar të Suedisë.
Te Hammarby u transferua në shkurt të këtij viti nga klubi turk, Kasimpasha. Më herët karrierë ka bërë edhe te Mersini në Turqi dhe Helsingborgu dhe Varnamo në Suedi.
