Një shpërthim i fuqishëm gazi në një sistem kanalizimi në një qytet jugor të Pakistanit vrau të paktën 10 persona dhe plagosi 13 të tjerë të shtunën, ka bërë të ditur policia dhe një zyrtar shëndetësor.
Zëdhënësi i policisë Sohail Jokhio, ka thënë se shpërthimi u shkaktua me sa duket kur diçka ndezi gazin që ishte grumbulluar në kanalizimet, nën një ndërtese bankare, në lagjen Shershah të qytetit port të Karaçit.
Jokhio tha se nuk ishte ende e qartë se çfarë e ndezi gazin, por një ekip ekspertësh i eksplozivëve ishte thirrur për të hetuar.
Dr. Sabir Memon në Qendrën e Traumës në Karaçi ka thënë se 10 njerëz u vranë dhe 13 të tjerë u plagosën, prej të cilëve, të paktën tre janë në gjendje kritike. Ai tha se disa të lënduar janë dërguar në repartin e kujdesit intensiv.
Jokhio tha se xhamat u thyen në ndërtesat aty pranë dhe një automjet i parkuar aty pranë u dëmtua rëndë.
Shumë kanale të ujërave të zeza në qytet janë mbuluar, kryesisht ilegalisht, duke ndërtuar struktura betoni mbi to./Gazeta “Enigma”/
