Presidenti serb, Aleksandar Vuçiq, i është drejtuar kombit të tij pasi në Bruksel nuk pati marrëveshje mes Kosovës dhe Serbisë.
Ai thotë se “të dhënat e inteligjencës tregojnë se situata është e vështirë dhe në prag konflikti”, raporton Danas.
“Sonte në katër lokacione në veri është dërguar gjithçka që ekziston nga e ashtuquajtura policia speciale në Prishtinë. Ka një zemërim të madh ndaj popullatës serbe në veri të Kosovës”, tha ai.
Sipas tij, “na pret një periudhë e vështirë, nuk ka arsye për panik, por duhet të jemi të shqetësuar”.
“Lutja ime do të jetë shumë e qartë, le të përpiqemi të ruajmë paqen. Duhet të tregojmë se nuk duam konflikt. Nëse protestojnë, le të jetë paqësore dhe demokratike. Serbia do ta respektojë kërkesën e Josep Borrellit dhe ne nuk do t’i rinovojmë targat, ndërsa Prishtina nuk do ta respektojë kërkesën”.
Siç shton ai, serbët duhet ta dinë se kanë shtetin e tyre pas tyre në përputhje me ligjin ndërkombëtar dhe Rezolutën 1244.
Vuçiq tha se ishte krenar që delegacioni nga Beogradi erdhi në Bruksel me një ide të qartë për të diskutuar dhe pajtuar “që të mos kërkojmë qime në vezë, të pranojmë kompromise dhe të ruajmë paqen dhe stabilitetin e të gjithë rajonit”.
Ai ka konfirmuar se Serbia nuk ka asnjë problem me targat KS për serbët në tërë territorin e Kosovës.
“Ne nuk kemi nevojë për KM, mjaftojnë targat neutrale KS. Për këtë, pala tjetër reagoi dhunshëm se UNMIK-u i takon të kaluarës në Kosovë dhe se ata kanë të drejtë të nxjerrin pasoja juridike nga pyetjet dhe gjykimet e GJND-së”.
