Kryetari i komunës së Rahovecit, Smajl Latifi, në një postim në rrjetin social Facebook ka bërë të ditur se është nisur drejtë Kroacisë që të ju del në ndihmë familjarëve e bashkëatdhetarëve tanë në këto momente të rënda tragjedie.
Ai është shprehur se me të marrë lajmin tronditës, për humbjen e jetëve të dy bashkëqytetarëve nga komuna e Rahovecit, ka marrë rrugën për në Kroaci, që të solidarizohet me familjarët e bashkëatdhetarët tanë në këto momente të rënda.
Tutje, Latifi ka shprehur ngushllime për të gjitha familjet e viktimave që humbën jetën në aksidentin tragjik në Kroaci./Gazeta Enigma/.
Postimi i plotë i tij:
Me të marrë lajmin tronditës, për humbjen e jetëve të dy bashkëqytetarëve tanë nga aksidenti i sotëm, kam marrë rrugën për në Kroaci, që të solidarizohem me familjarët e bashkëatdhetarët tanë në këto momente të rënda.
Kujtim Kastrati nga Malësia e Vogël dhe Anjeza Bellanica nga Krusha e Madhe, janë dy viktimat e konfirmuara nga komuna e Rahovecit, për të cilët lumturia e ardhjes në atdhe u kthye në një hidhërim për gjithë të afërmit, të njohurit, dhe të gjithë ne.
Familjeve Kastrati dhe Bellanica u shpreh ngushëllime të sinqerta dhe solidaritetin tim më të thellë, i lutem Zotit të gjejnë forcë për të përballuar dhimbjen e kësaj humbjeje të tmerrshme për ndarjen nga jeta të fëmijëve të tyre të dashur dhe uroj që shpirti i viktimave të gjejë paqen e merituar!
Poashtu, më lejoni të ju njoftoj se gjatë tërë ditës kam qenë në kontakt të vazhdueshëm me ambasadorin e Kosovës në Kroaci, z. Gëzim Kasapolli, dhe Kolonel, Atashe Ushtarak i Mbrojtjes në Ambasadën e Republikës së Kosovës në Kroaci, z.Skënder Hoxha, të cilët i falënderoj për kujdesin dhe interesimin e tyre!Kjo dhimbje duhet të na forcojë kujtimin për ata që humbën jetën, dhe për idealet e tyre dhe perspektivën për një jetë më të mirë!
Shërim të shpejtë të lënduarve!
Kujtimi dhe Anjeza, pushofshin në paqe!
Ngushëllime të gjithë familjarëve të viktimave për humbjen e më të dashurve të tyre!SL
