Ministri i Administrimit të Pushtetit Lokal, Elbert Krasniqi, të martën ka njoftuar se një shtëpi e ndërtuar nga Qeveria në veri, është kapluar nga zjarri, raporton Gazeta Enigma.
Ai ka theksuar se nuk ka persona të lënduar, por veç dëme materiale.
“Rreth orës 00:30 gjatë mesnatës një patrollë policore ka identifikuar tym në një nga shtëpitë e ndërtuara nga Qeveria në Kodrën e Minatorëve. Zjarri është fikur dhe dëmet janë sanuar. Fatmirësisht, nuk ka asnjë person të lënduar veç dameve materiale. Kjo nuk është hera e parë që ka sulme të tilla, mirëpo kjo nuk është as hera e fundit që do të ndërtohen shtëpi të reja”, njoftoi ministri.
“Qeveria e Republikës së Kosovës e denon fuqishëm këtë akt dhe as ky e asnjë sulm tjetër nuk e ndal kthimin e banorëve në pronat e tyre. Kërcënimet, shantazhet, pamfletat terroriste, nuk i friksojnë qytetarët dhe as nuk e ndalojnë punën tonë për sigurimin e banimit të qendrueshëm”.
Krasniqi e cilësoi këtë veprim si nxitje e mosdurushmërisë etnike.
“Ky sulm është nxitje e mosdurushmërisë etnike e cila nxitet nga Vuçiçi i cili ka mbetur i mbyllur në propagandën e tij dhe e ka humbur kontrollin e strukturave paralele në pjesën veriore”. / Gazeta Enigma.
