Në Kuvendin e Republikës së Kosovës, sot u mbajt Sesioni i parë i Takimit të 11-të të Komisionit Parlamentar të Stabilizim Asocimit BE-Kosovë, në fjalën e tij zv.kryeministri i Kosovës, Besnik Bislimi ka kërkuar të largohen masat ndaj Kosovës, shteti ynë të marrë statusin e kandidatit për BE dhe të bëhet anëtarësimi në KiE.
Sipas njoftimit dërguar mediave, në këtë takim, Bislimi ishte pjesëmarrës bashkë me kryetarin e Kuvendit, Glauk Konjufca, ministrin për Komunitete dhe Kthim, Nenad Rashiq, përfaqësuesen nga zyra e BE-së në Kosovë, AnnaCarin Platon, deputetja dhe kryetarja e Komisionit Parlamentar për Stabilizim-Asocim, Mimoza Kusari-Lila, si dhe bashkëkryesuesi i këtij komisioni, njëherësh eurodeputeti, Lukas Mandl.
Mes tjerash, Bislimi ka deklaruar se Kosova i përket Bashkimit Evropian dhe “po punojmë secilën ditë që kjo të bëhet realitet sa më shpejtë, jo vetëm si qëndrim politik, por edhe si qëndrim e vullnet i qytetarëve të vendit”.
Në veçanti ka kërkuar që të “largohen masat restriktive, dhe tashmë absurde, ndaj Kosovës, duhet sa më shpejt Kosova të marrë statusin e kandidatit për BE dhe na duhet anëtarësimi në Këshillin e Evropës”.
Sipas njoftimit të ZKM-së, zëvendëskryeministri Bislimi, në fjalën e tij, potencoi se “Republika e Kosovës i vlerëson lartë rezolutat dhe thirrjet e vazhdueshme të Parlamentit Evropian për njohjen e Kosovës nga 5 shtetet mos njohëse, për njohjen e progresit që Kosova ka arritur në reformat e thella politike dhe ekonomike, që ndërlidhen me integrimin tonë evropian, për marrjen e vendimit për liberalizimin e vizave për qytetarët tanë, për mirëpritjen e aplikimit tonë për anëtarësim në Bashkimin Evropian, për mbështetjen e aplikimit tonë në Këshillin e Evropës, për thirrjen ndaj Komisionit Evropian për largimin e masave restriktive, edhe për dënimin e sulmit agresor e terrorist në Banjskë në termat më të ashpër. Për të gjitha këto, jemi thellësisht falënderues.”
