Presidentët, kryeministrat, monarkët dhe udhëheqësit në mbarë botën kanë bërë homazhe pas vdekjes së Mbretëreshës Elizabeth II.
Disa ndanë kujtime personale për mirësinë dhe humorin e saj, të tjerë duke vënë në dukje se si Mbretëresha ka qenë një “konstante e kujdesshme” gjatë turbulencave globale, shkruan Euronews, transmeton Klankosova.tv.
Ndjenjat e tyre u pasqyruan edhe në titujt e gazetave të së premtes.
Nderimet më të përzemërta u ndanë nga gazetat në Mbretërinë e Bashkuar, vendi ku mbretëresha Elizabeth sundoi për 70 vjet.
Shumë gazeta, duke përfshirë Guardian, zgjodhën një imazh të kurorëzimit të Mbretëreshës Elizabeth – në qershor 1952 – për faqen e tyre të parë.
The Telegraph zgjodhi një foto portret më të fundit të Mbretëreshës, dhe referencë në fjalimin e saj të famshëm pas sulmeve terroriste të 11 shtatorit në Shtetet e Bashkuara.
“Asgjë që mund të thuhet nuk mund të fillojë të largojë ankthin dhe dhimbjen e këtyre momenteve. Hidhërimi është çmimi që paguajmë për dashurinë”.
Homazhet u ndanë edhe nga gazetat në 15 shtetet e tjera sovrane ku mbretëresha Elizabeth shërbeu si kryetare e shtetit.
Shumë faqe të para në Australi iu dedikuan një fotoje të mbretëreshës Elizabeth së bashku me fjalën “E pazëvendësueshmja”.
Ballinat e gazetave me kujtime të përzemërta ishin edhe në Evropë, ku Mbretëresha ka kushërinj të largët mbretërorë dhe u adhurua nga miliona.
Faqja e parë e gazetës suedeze Dagens Nyheter iu kushtua një fotografie të Mbretëreshës nga festimet e fundit të Jubileut Platinum në qershor, që shënoi 70-vjetorin e saj në fron.
Në Francë — vendi evropian ku mbretëresha Elizabeth e vizitonte më shpesh se çdo tjetër — gazetat ishin gjithashtu reflektuese.
E përditshmja e qendrës së majtë Libération zgjodhi titullin “La peine d’Angleterre” (“Dhimbja e Anglisë”) ndërsa një botim special i Le Parisien titullohej “Nous l’avons tant aimée” (“Ne e donim aq shumë”) .
Gazetat gjermane gjithashtu i kushtuan faqet e tyre të para portreteve të Mbretëreshës Elizabeth të premten.
Der Spiegel shfaqi një imazh të Mbretëreshës me sytë mbyllur krahas titullit “Die Letzte Majestät” (“Madhështia e fundit”).
Ndërkohë, Die Bild zgjodhi të përmbledhë emocionet globale në vdekjen e Mbretëreshës Elizabeth. “Die Welt weint um die Queen” (“Bota qan për Mbretëreshën”).
