Kryetari i Shoqatës së Familjeve të Dëshmorëve, Xhavit Jashari, i ka bërë thirrje qeverisë që të respektojë ligjin që sipas tij, në rast të ngritjes së pagës minimale duhet të ngritet edhe beneficioni i veteranëve të luftës.
Ai ka deklaruar se në rast se kjo nuk do të respektohet nga qeveria, atëherë si shoqatë do të kundërshtojnë në forma të ndryshme.
“Ne ua kemi përçuar mesazhin institucioneve të vendit që nuk do të lejohet tutje që të nëpërkëmben këto kategori dhe i kemi bërë thirrje qeverisë që të respektojë ligjin dhe të mos i degradojë tutje veteranët e luftës kur parashihet me ligj që nëse ngritet paga minimale duhet të ngritet me automatizëm edhe beneficioni i veteranëve të luftës në këtë kundërtën ne kemi paralajmëruar se do të kundërshtojmë me forma të ndryshme dhe do të ishte mirë që deputet e parlamentit pa dallim partie politike që janë ulur në ato ulëse dhe që e kanë marrë besimin e qytetarëve që të mos e keqpërdorin dhe të kenë konsideratë për këto kategori”, ka thënë ai.
Jashari ka theksuar se nuk do të lejojnë që të kalojë një ligj që sipas tij diskriminon veteranët e luftës.
“Si do të veprojnë deputetët, ne kemi biseduar me deputetët por besoj që do t’i thërrasim zërit të arsyes dhe nuk do të lejojmë që të kalojë një ligj ku diskrimonon kategori shumë të rëndësishme si veteranët e luftës”, shtoi ai.
“Do të duhej deputetët që janë në pushtet deputetët e VV-së, kemi aty deputetë që janë njerëz që kanë vlerë, kanë qenë të burgosur politikë, që kanë dhënë për lirinë e Kosovës, dhe unë u bëj thirrje që të veprojnë drejt dhe konsideroj që interesat e një partie por edhe të deputetëve është interesi nacional”, ka potencuar ai për PortalD.
Ai ka ritheksuar thirrjen ndaj qeverisë që të vlerësojnë drejt dhe të çmohet vlera e veteranëve.
Të hënën e kaluar, veteranët protestuan para Kuvendit të Kosovës, me kërkesën që pensioni i veteranit të përfshihet të Projektligjin për Pagën Minimale. Projektligji nuk kaloi për shkak të mungesës së kuorumit në Kuvend, ndërsa pritet të votohet këtë të martë.
Në projektligjin për pagën minimale, veteranët nuk janë përfshirë. Më herët, pensioni i veteranëve ishte i lidhur me pagën minimale. Pushteti thotë se ndarja mes pensionit dhe pagës minimale është bërë para pesë vjetësh.
Me projektligj, parashihet që paga minimale të rritet në 264 euro bruto.
