KF Dukagjini ka zyrtarizuar vazhdimin e bashkëpunimit me kryetrajnerin Ismet Munishi për sezonin 2024/25.
Lajmi është bërë i ditur nga vetë klubi përmes një njoftimi në faqen zyrtare në Facebook, ku theksohet se marrëveshja e re vjen si vazhdimësi e një pune të përbashkët të suksesshme.
“Me shumë kënaqësi njoftojmë opinionin publik dhe tifozët se po vazhdojmë bashkëpunimin me kryetrajnerin, Ismet Munishi, edhe për një sezon tjetër”, shkruan KF Dukagjini, duke theksuar rëndësinë që kanë stabiliteti dhe përkushtimi i Munishit për objektivat e klubit.
Klubi e vlerëson lartë ndikimin e Munishit në projektin sportiv dhe beson se vazhdimësia në pankinë do të jetë një element kyç për suksesin në sezonin e ardhshëm.
KF Dukagjini gjithashtu falënderon trajnerin për besimin dhe angazhimin e tij, duke i uruar suksese të mëtejshme në udhëheqjen e skuadrës.
Me këtë vendim, skuadra nga Klina konfirmon ambiciet për të ndërtuar një grup të qëndrueshëm dhe konkurrues në futbollin kosovar.
