Rrjeti Evropian i Politikave Sociale ka dalë me raport të ri për zhvillimet e fundit të politikave sociale, ku ndër katër shtete, është përmendur edhe Kosova, për nismën e pagesave mujore për fëmijët e lindur nga viti 2015, si dhe pagesën për nënat lehone.
“Qeveria e Kosovës ka prezantuar një përfitim të përgjithshëm për fëmijë, i cili mbulon fëmijët nën shtatë vjeç që nga nëntori i vitit 2021 dhe i cili do të zgjerohet për të gjithë fëmijët nën 16 vjeç më së voni deri në vitin 2023. Qeveria ka shtrirë gjithashtu përfitimin e lehonisë për gratë e papuna. Të dy programet financohen nga taksat e përgjithshme”, thuhet në raportin nga Rrjeti Evropian i Politikave Sociale.
Në këtë raport, Kosova është paraqitur me fusnotë.
Rrjeti po ashtu ka raportuar mbi zhvillimet e reja në Finlandë, Luksemburg dhe Portugali.
“Për të garantuar cilësinë e kujdesit afatgjatë, qeveria finlandeze miratoi legjislacionin për raportin infermier-klient. Megjithatë, reforma ka hasur në probleme të rënda të shkaktuara nga mungesa e personelit infermieror të nevojshëm për të përmbushur standardet e cilësisë që kërkon legjislacioni”.
“Në tetor 2021, qeveria e Luksemburgut njoftoi masa të ndryshme, duke përfshirë përfitimet sociale, politikat e arsimit dhe strehimit, që do të hyjnë në fuqi gjatë vitit 2022. Zbatimi i të parës prej tyre tani ka filluar”.
“Propozimi për një strategji për luftën kundër varfërisë në Portugali (2021-2030) u miratua më 30 shtator 2021 dhe u dorëzua në konsultim publik deri më 25 tetor 2021. Strategjia përfaqëson një konsensus politik dhe social dhe plotëson një boshllëk të kahershëm. Pavarësisht gjithëpërfshirjes së tij, do të nevojiten rregullime të imta dhe rrugë specifike për zbatim. Rezultatet e konsultimit publik janë ende të panjohura”. / Gazeta Enigma.
