Një grup dypartiak i senatorëve amerikanë ka premtuar solidaritet dhe armë gjatë një vizite në Kiev, duke paralajmëruar presidentin rus Vladimir Putin të mos nisë një ofensivë të re ushtarake kundër Ukrainës.
Kievi dhe aleatët e tij perëndimorë dhanë alarmin pasi Rusia mblodhi dhjetëra mijëra trupa pranë kufijve të Ukrainës dhe ushtroi presion ndaj Shteteve të Bashkuara për garancitë e sigurisë, duke përfshirë një bllokadë të pranimit të Ukrainës në NATO.
Rusia mohon planifikimin e një sulmi të ri ushtarak. Shtetet e Bashkuara kanë qenë mbështetësi më i fuqishëm i Ukrainës në konfliktin me Moskën pas aneksimit të Krimesë nga Rusia në vitin 2014 dhe shpërthimit të luftës në Ukrainën lindore.
“Unë mendoj se Putin bëri gabimin më të madh të karrierës së tij duke nënvlerësuar se sa guxim do ta luftojnë populli i Ukrainës nëse ai pushton”, u tha gazetarëve senatori Richard Blumenthal.
“Ne do të vendosim sanksione të rënda ekonomike, por më e rëndësishmja, ne do t’i japim popullit të Ukrainës armë, armë vdekjeprurëse që u duhen për të mbrojtur jetën e tyre”, tha ai pas një takimi midis delegacionit dhe presidentit ukrainas Volodymyr Zelensky. Ato armë mund të përfshijnë raketa antitank Javelin, raketa Stinger, armë të vogla dhe varka, tha ai.
“Mesazhi ynë është: do të ketë pasoja nëse ai vendos të shkelë shenjtërinë e kësaj demokracie”, shtoi senatori Amy Klobuchar. /Gazeta “Enigma”/
