Gjermania ende është duke e shqyrtuar kërkesën e ministrit të Punëve të Brendshme të Kosovës, Xhelal Sveçlës në lidhje me pasaportat.
Këtë e ka konfirmuar Ambasada e Gjermanisë për Indeksonline.
“Ambasada Gjermane konfirmon se Qeveria Federale e ka pranuar kërkesën e përmendur më 6 janar 2023. Kërkesa aktualisht është duke u shqyrtuar nga Ministria Federale e Brendshme”.
“Kërkesa e bërë nga ministri Sveçla kufizohet në lejimin e ri-hyrjes në Gjermani për shtetasit kosovarë që jetojnë në Gjermani me leje qëndrimi të vlefshme dhe foshnjat me shtetësi kosovare që kanë lindur në Gjermani dhe ende nuk u është lëshuar pasaporta e Kosovës”.
Kujtojmë se Ministria e Punëve të Brendshme nuk është duke lëshuar pasaporta për qytetarët e Kosovës për shkak se ka mungesë të materialit për furnizim me pasaporta. Si rezultat i kësaj, ministri Sveçla i ka parashtruar kërkesë Gjermanisë që të ketë konsideratë për rastet në fjalë.
