E lindur me një kromozom më shumë, 22- vjeçarja Eloida Alija nuk ka pasur shumë pengesa në rrugëtimin dhe realizimin e ëndrrave të saj, shkruan Gazeta “Enigma”.
Ajo shkollën fillore e ka përfunduar në fshatin Balaj të komunës së Ferizajt në shkollën “Pavarësia”.
Frika se mos has në ndonjë bullizëm e bëri atë që të mos vazhdonte shkollën më tutje.
Tani Eloida punon si asistente e njërit nga stomatologët e këtij qyteti. Ajo ka thënë se kjo punë, ka qenë ëndërr e saj.
Burim Buzhala është stomatologu, i cili ja hapi dyert kësaj 22 vjeçare duke i realizuar dëshirën më të madhe që kishte. Eloida punon si asistente që nga mosha 18 vjeçare.
Ndërsa nëna e saj, Indira Alijaj ishte shoqëruesja më e mire përgjatë gjithë këtyre viteve, e cila e ka përcjellë në çdo hap.
Në një rrëfim për Gazetën Enigma, 22 vjeçarja Eloida Alija dhe nëna e saj Indira Alija tregojnë për sfidat në jetën e tyre.
Dita e Eloidës fillon në qendrën e sindromit Down bashkë me shokët dhe shoqet e saja.
“Zgjohem në mëngjes dhe shkojë në qendrën e sindromit Down, ku aty punojë kartolina shumë të bukura së bashku me të tjerët. Mandej pasdite duke filluar prej orës 14:00 shkojë në punë në klinikën e stomatologjisë ku edhe punojë si asistente”, ka deklaruar Eloida.
Tutje ajo ka treguar më në detaje për punën që kryen.
“Unë jam një asistente në një klinikë stomatologjie, puna që bëjë është pastrimi i instrumenteve, ose shërbim doktorit në ofrimin dhe vendosjen e dorezave”, ka thënë Eloida për Enigmën.
Eloida nuk lë pa përmendur edhe kafen që e pinë çdo ditë me personin e saj të zemrës, me nënën e saj.
“Pas mbarimit të punës unë takohem me nënën time dalim për kafe dhe pastaj së bashku shkojmë në shtëpi”, ka thënë ajo.
Eloida ka theksuar se “ka raste kur shkoj në punë dhe kthehem në shtëpi edhe vetëm pa përcjelljen e nënës ose dikujt tjetër”.
Ndërsa Indira Alija, nëna e Eloidës në një rrëfim për Gaztën Enigma ka treguar sfidat me të cilat është përballuar ajo.
“Sfidat kanë qenë shumë të mëdha për shkak të rrethit të shoqërisë, për shkak të mos përkrahjes e të gjitha nga pak”, ka thënë ajo.
Nëna e Eloidës, Indira tregon edhe momentin kur e vogla e saj erdhi në jetë.
“Menjëherë mbas luftës lindi Eloida, unë nuk e dija çka është sindroma Down, edhe pse si figura kam parë edhe më herët fëmijë të tillë, por nuk kam pasur njohuri më shumë rreth kësaj sindrome dhe s’kisha dëgjuar për të”, ka deklaruar ajo.
“Jam krenare dhe me fat që kam një vajzë si Eloida”
“Por tash e di dhe jam me fat që kam një vajzë si Eloida, në çdo sfidë që kam hasur dhe në shumë fjalë që kam pasur nga njerëz të ndryshëm që s’do ja dilja, Eloida me një buzëqeshje ju ka treguar të gjithëve se unë mundem dhe ia dola”, ka theksuar Alija për Enigmën.
Eloidën dhe shokët e saj kush i përkrahë më shumë, institucionet publike apo ato private?
“Përkrahja më e madhe është prej bizneseve private, në ato publike unë nuk di që ka ndonjë person me sindromin Down të punësuar. Nëse do më jepej mundësia unë Eloidën time do e dërgoja menjëherë”, ka thënë nëna e saj.
Tutje Indira Alija, ka theksuar se “interesimi për të prekurit nga sindroma Down është më së shumti në Ditën Botërore të sindromës Down, pra më 21 mars”.
Kujtojmë se personat me sindromën Dawn gëzojnë të drejta të plota dhe të barabarta me gjithë të tjerët. Kjo nënkupton mundësinë për pjesëmarrje të plotë në komunitetin e tyre.
Realiteti tregon se prania e qëndrimeve negative kundrejt këtyre personave sjell pritshmëri të ulëta, diskriminim dhe përjashtim, duke krijuar komunitete në të cilat fëmijët dhe të rriturit me sindromin Down nuk mund të integrohen në mënyrë të barabartë. /GAZETA ENIGMA/
