Asociacioni i Gazetarëve të Kosovës, është shprehur i shqetësuar pas dy rasteve të pengimit të gazetarëve gjatë punës së tyre, raporton Gazeta Enigma.
AGK-ja janë shprehur të shqetësuar pas denoncimit të gazetarit, Kosovë Gjoci, të Euronews Albania, për pengimin në punë nga mbrojtja e afërt e Kryeministrit të Kosovës, Albin Kurti, si dhe, pengimi në përpjekjet për të bërë pyetje për Ministren e Ekonomisë, Artane Rizvanolli që iu bë para disa ditësh gazetares së Periskopit, Besarta Hotit.
Më poshtë gjeni reagimin e plotë të AGK-së:
“Dy raste të pengimit të punës së gazetarëve nga mbrojtja e afërt e Kryeministrit Kurti dhe Ministres Rizvanolli
Asociacioni i Gazetarëve të Kosovës është i shqetësuar pas denoncimit të gazetarit, Kosovë Gjoci, të Euronews Albania për pengimin në punë nga mbrojtja e afërt e Kryeministrit të Kosovës, Albin Kurti.
Gjoci ka njoftuar se dy individë nga mbrojtja e kanë penguar në punë – njëri e ka shtyrë duke ia dëmtuar pajisjet, kurse tjetri e ka kërcënuar me fjalët “këqyrem mirë në sy e mbajmë në mend”.
Sipas gazetarit Gjoci, kryeministri Kurti e ka parë skenën dhe nuk ka reaguar, që e bën rastin edhe më të rëndë.
Ngjashëm, para disa ditësh gazetarja e Periskopit, Besarta Hoti, u pengua në përpjekjet për të bërë pyetje për Ministren e Ekonomisë, Artane Rizvanolli.
AGK-ja, i konsideron këto veprime të papranueshme dhe i bën thirrje qeverisë dhe dikastereve të saj të mundësojnë kushte elementare të punës për gazetarët kur raportojnë dhe kërkojnë përgjigje nga anëtarë të ekzekutivit.” /Gazeta Enigma
