Janë zbuluar detaje të reja pas lëshimit të alarmit në Mitrovicën e Veriut.
Policia e Kosovës raportohet se ka shkuar atje për ta arrestuar një serb të dyshuar, si i përfshirë në dhunën e ushtruar në veri.
Si rrjedhojë e kësaj, serbët pjesë grupeve kriminale janë mbledhur dhe kanë filluar gjuajtjet me gurë në drejtim të Policisë. Mediat serbe raportojnë se Policia ka përdorur gaz lotjsellës.
Zëdhënësja e Policisë së Kosovës, Luljeta Mehmeti, e ka konfirmuar arrestimin e një personi në Mitrovicën e Veriut.
Mehmeti tha që një person është lënduar lehtë gjatë arrestimit të dyshuarit, ndërsa dy policë të rendit janë lënduar pas operacionit.
“Mund të konfirmojmë se sot më datë 13.06.2023, në komunën Mitrovicë Veri, Policia e Kosovës ka arrestuar një person të dyshuar për disa vepra penale. Gjatë arrestimit të personit të dyshuar është lënduar lehtë një zyrtar policor. Pas operacionit njësitet policore kanë hasur në rezistencë dhe janë sulmuar me ç’rast 2 zyrtarë policorë të rendit raportohet të jenë lënduar lehtë. Të gjitha njësitë relavante policore janë duke u marrë me rastin dhe ofrimin e sigurisë”, tha Mehmeti.
Ministri i Punëve të Brendshme, Xhelal Sveçla ka bërë të ditur se është arrestuar njëri nga organizatorët e sulmeve ndaj pjesëtarëve të KFOR-it.
Policia e Kosovës ka arrestuar sot serbin Milun Milenkovic-Llune, i cili është një nga udhëheqësit e formacionit kriminal “Mbrojtja Civile”.
