Një zyrtar i Rusisë e pranoi të dielën se Ukraina e kishte marrë sërish nën kontroll një fshat në rajonin jugor të Zaporizhzhias, fitimi i saj i dytë në front që kur nisi kundërsulmimin në fillim të këtij muaji.
Zyrtari, Vladimir Rogov, tha se forcat ukrainase e kishin marrë vendbanimin e Piatykhatky dhe ishin vendosur atje derisa ishin nën zjarr nga artileria ruse.
“Ofensivat ‘si valë’ të armikut dhanë rezultate, pavarësisht humbjeve të mëdha,” tha Rogov në aplikacionin e mesazheve Telegram.
“Luftimet e ashpra vazhdojnë në zonë”, shtoi ai. Ukraina nuk dha asnjë deklaratë për këtë çështje.
Rusia thotë se po u shkakton humbje të mëdha forcave të Kievit dhe presidenti Vladimir Putin tha javën e kaluar se Ukraina nuk kishte “asnjë shans” për sukses në kundërofensivë.
Ukraina tha javën e kaluar se kishte rifituar kontrollin e rreth 100 kilometrave katror territor në pak më shumë se një javë, duke rimarrë një varg fshatrash në rajonin e Donetskut në lindje, shkruan Reuters.
