Presidenti Agim Ademi është pritur në takim sot nga kryetari i kryeqytetit, Përparim Rama, ku temë diskutimi ishte projekti i stadiumit të ri, raporton Gazeta “Enigma”.
Gjatë këtij takimi krerët e të dy institucioneve diskutuan për gjendjen e infrastrukturës sportive në Prishtinë, si dhe për ndeshjet e ekipeve tona në garat ndërkombëtare dhe për eventet të cilat janë paraparë nga komuna që të organizohen në stadiumin ‘Fadil Vokrri’.
Gjithashtu, ata kanë theksuar nevojën për ndërtimin e një stadiumi të ri në kryeqytet. Presidenti Ademi e njoftojë të parin e kryeqytetit me të gjithë orarin dhe vështirësitë që po i has federata me fushën e stadiumit ‘Fadil Vokrri’, duke pas parasysh aktivitetet e ngjeshura të ekipeve Kombëtare dhe katër klubeve tona të cilat janë duke marrë pjesë në garat ndërkombëtare, e po ashtu edhe eventet e planifikuara në stadium.
Ademi vuri në pah se është shumë e vështirë të ruhet fusha dhe as nuk ka hapësirë kohore për ta ndërruar barin. Prandaj, theksoi presidenti Ademi, jemi në situatë të vështirë, pasi që Kosovës i ka mbetur vetem ky stadium i kategorisë së IV të UEFA-s.
Ai bëri thirrje që sa më parë të vazhdohet puna në stadiumet në të cilat janë ndërprerë punimet. Nga ana e tij kryetari i kryeqytetit premtoi se do të angazhohet për të rregulluar dhe përmirësuar gjendjen e stadiumit “Fadil Vokrri”.
Ai gjithashtu njoftoi se ditëve në vazhdim do të shpallet konkursi i kompanive projektuese për ta përzgjedhur projektin më të mirë për stadiumin e ri i cili do të ndërtohet në Prishtinë dhe do të jetë në shfrytëzim të plotë nga FFK-ja me ekipet Kombëtare si dhe për ngjarje tjera të kryeqytetit.
Ky stadium do të përmbushë standartet e UEFA-s dhe FIFA-s dhe do të shërbejë për ndeshjet zyrtare të garave kombëtare, evropiane dhe ndërkombëtare. Projekti do të mbështetet në bashkëpunimin midis Komunës së Prishtinës dhe FFK-së.
Stadiumi i ri pritet të ketë një kapacitet prej rreth 25.000 ulësesh dhe do të plotësojë kërkesat e publikut të kryeqytetit dhe të gjithë Kosovës. Presidenti Ademi dhe ekipi i tij u shprehën të kënaqur me takimin dhe diskutimet e zhvilluara me kryetarin Rama dhe uruan që ky projekt të realizohet sa më shpejtë./GAZETA ENIGMA/
