Bobby Charlton, i njohur gjerësisht si një nga futbollistët më të mëdhenj të të gjitha kohërave dhe lojtari më i famshëm që Anglia ka pasur, ka ndërruar jetë në moshën 86-vjeçare.
Manchester United postoi një fotografi të ish-lojtarit në X me mbishkrimin “Sir Bobby Charlton CBE, 1937-2023. Fjalët nuk do të mjaftojnë kurrë.”
Fituesi i Kupës së Botës me Anglinë në vitin 1966, Charlton pothuajse krejt karrierën e kaloi te Manchester United, ku fitoi tre tituj në Premier League dhe një Kupë Evropiane. Charlton ishte një nga lojtarët që shpëtoi në tragjedinë e Munichut, kur në vitin 1958 aeroplani me lojtarët e Manchester Unitedit u rrëzua.
Ai regjistroi 758 paraqitje për Unitedin, që ishte rekord deri kur u kalua nga Ryan Giggs.
Charlton shënoi 249 gola për klubin e kuq, rekord që më pas u thye nga Wayne Rooney. Ai ishte edhe golashënuesi më i mirë i Kombëtares së Anglisë me 49 gola, rekord që po ashtu u kalua nga Rooney më 2015.
