Numri i madh i aksidenteve në trafik po vazhdon të jetë shqetësues. Në të shumtën e rasteve, aksidentet shkaktohen si pasojë e pakujdesisë së shoferëve gjatë vozitjes, duke rrezikuar kështu jetën e tyre dhe të pjesëmarrësve tjerë në trafik. Vetëm në 24 orët e fundit, janë shënuar 63 aksidente në trafik, ku njëri prej tyre ka ndodhur në Pejë dhe i dyshuar është një person i moshës së mitur.
I mituri që shkaktoi aksidentin derisa ishte duke lëvizur me një veturë në rrugën “Eliot Engel”, ku goditi një këmbësor 64-vjeçar tashmë ndodhet nën masën e ndalimit policor.
Për pasojë, viktima është dërguar në Spitalin Rajonal të Pejës dhe siç mëson Sinjali, i njëjti ka pësuar lëndime të rënda trupore.
Rastin e ka konfirmuar edhe Policia dhe ka njoftuar se për pasojë, viktima ka pësuar lëndime trupore dhe është dërguar në Spitalin Rajonal të Pejës.
“Është arrestuar i dyshuari mashkull kosovar-i mitur, pasi që i njëjti duke drejtuar veturën, dyshohet se nga pakujdesia ka goditur këmbësorin mashkull kosovar, të cilit i ka shkaktuar lëndime trupore. Viktima është dërguar për tretman mjekësor në spitalin e Pejës, ndërsa i dyshuari me vendim të prokurorit është dërguar në mbajtje.”
