Trajneri Gareth Southgate ka zbuluar se mbrojtësi i Arsenalit, Ben White, kërkoi të mos konsiderohej për skuadrën e Anglisë përpara ndeshjeve miqësore të këtij muaji.
Anglia pret Brazilin dhe Belgjikën në ndeshje miqësore përpara Kampionatit Evropian të kësaj vere dhe Southgate ka emëruar skuadrën e tij prej 25 lojtarësh, e cila përfshin thirrjen e parë për mbrojtësin e Evertonit, Jarrad Branthwaite.
Por, nuk ka vend për yllin e Arsenalit, White, me trajnerin Southgate që ka zbuluar arsyen e mungesës së tij.
Duke folur në konferencën e tij për shtyp para ndeshjes, trajneri i Tre Luanëve tha se White kërkoi të mos merrej në konsideratë për skuadrën.
“Është e qartë se në këtë formë nuk mund të ulem këtu dhe të them se ai nuk e meriton të jetë brenda ekipit”, ka shpjeguar fillimisht Southgate.
“John McDermott dhe unë, patëm një telefonatë nga Edu (drejtori sportiv i Arsenalit) javën e kaluar dhe ai tha se Ben nuk donte të konsiderohej për skuadrën e Anglisë në këtë moment”.
“Për mua është një turp i madh. Ai është një lojtar që e çuam në Euro, një lojtar që e çuam në Kupën e Botës dhe fola me të pas Katarit sepse doja ta zgjedhja”.
“Ai nuk është i disponueshëm për ne dhe nuk ka asnjë problem mes nesh dhe unë gjithashtu duhet të them se nuk ka kurrë ndonjë problem me trajnerin Steve Holland sepse kjo është përmendur në artikuj dhe nuk më pëlqen”.
“Unë dua që ajo derë të jetë e hapur. Ai do të ishte në këtë skuadër, por ai nuk është i disponueshëm për ne dhe unë duhet të fokusohem se kush mund të na ndihmojë”, përfundoi përzgjedhësi i Anglisë.
White, 26 vjeç, ka katër ndeshje ndërkombëtare në emër të tij pasi bëri debutimin e tij me Anglinë në vitin 2021.
Ai u emërua në skuadrën e Anglisë për Kupën e Botës 2022, por u largua nga turneu për arsye personale. /
