Federata e Futbollit e Kosovës (FFK) ka njoftuar zyrtarisht se shtatë klube nga futbolli janë licencuar për të marrë pjesë në garat evropiane.
FFK ka njoftuar se komisioni i Shkallës së Parë për Licencimin e klubeve për garat e UEFA-s, ka marrë vendimet në lidhje me procesin licencues për edicionin 2024/25 të garave të UEFA-s.
Për licencim për garat e UEFA-s kanë aplikuar 7 klube nga Superliga e meshkujve dhe 1 klub nga Superliga e femrave.
Nga 8 klube, sa e kanë nisur procesin e licencimit, 7 prej tyre janë licencuar, kurse një nuk është licencuar.
Klubet e licencurara janë: FC Ballkani, FC Drita, FC Llapi, FC Malisheva, FC Prishtina dhe SC Gjilani nga futbolli i meshkujve, ndërsa KFF Mitrovica nga futbolli i femrave.
FFK ka njoftuar gjithashtu se klubi i vetëm që nuk ka marrë licencën për garat e UEFA-s për edicionin 2024/25 është: KF Dukagjini nga Klina.
Ndryshe, Kosova i dërgon katër ekipe në garat ndërkombëtare nga futbolli i meshkujve, ku Ballkani, Drita dhe Llapi e kanë siguruar, ndërsa vendi i fundit synohet nga Malisheva dhe Prishtina.
