Gjatë kësaj së premte janë nënshkruar kontratat për ndërtimin e rrugës Prizren-Tetovë.
Këtë lajm e ka bërë të ditur ministri i Infrastrukturës, Liburn Aliu.
Aliu ka njoftuar se kontratat për Lot 1 dhe Lot 3, bashkë kanë vlerë prej mbi 18 milionë euro.
“Sot janë nënshkruar kontratat për realizimin e Rrugës Prizren-Tetovë, me gjatësi prej 20.350km, përkitazi ndërtimin e Rrugës Prizren-Kufiri me Maqedoninë e Veriut (Tetovë), për Lot 1 në vlerë prej 7,999,999.00 euro, si dhe Lot 3 në vlerë prej 8,346,804.38 euro”.
“Kjo rrugë i lidhë dy autostrada ndërkombëtare të cilat kalojnë në të dy anët e maleve të Sharrit, dhe lidhja e këtyre dy rrugëve në pikën më të afërt mes tyre, përveç se i afron dy qytetet dhe dy shtetet tona, ajo mundëson edhe hapjen e një korridori të ri rrugor me ndikim ekonomik për të dyja vendet”, shkroi Aliu.
Tutje ai bëri të ditur se Organi Shqyrtues i Prokurimit e ka kthyer në rivlerësim Lotin 2, gjë për të cilin, Aliu nuk dha detaje se pse është bërë një gjë e tillë. /Gazeta Enigma
