Nga dy milionë euro ka të drejtë t’i shpenzojë secili subjekt politik që do të certifikohet për pjesëmarrje në zgjedhjet e 9 shkurtit. Vendimi u mor të mërkurën nga Komisioni Qendror i Zgjedhjeve.
Sipas vendimit të KQZ-së, shuma e saktë e lejuar për shpenzime maksimale është 2 milionë e 47 mijë e 149 euro. Kjo është e barabartë me numrin e votuesve të regjistruar në listat preliminare të votuesve. Llogaritja është bërë duke u mbështetur në Rregulloren zgjedhore për fushatën e zgjedhjeve.
KQZ-ja po ashtu ka vendosur për themelimin e komisionit për shqyrtimin e kundërshtimeve administrative të parashtruara kundër njoftimit për regjistrim të votueseve jashtë Kosovës. Sipas Ligjit nr. 08/L-228 për Zgjedhjet e Përgjithshme, çdo aplikues, të cilit i është refuzuar regjistrimi, ka të drejtë në kundërshtim administrativ ndaj njoftimit brenda Komisionit Qendror të Zgjedhjeve.
Zgjedhjet e rregullta parlamentare janë caktuar për t’u mbajtur më 9 shkurt të vitit të ardhshëm.
