Drejtori i Agjencisë Qendrore të Inteligjencës Amerikane (CIA), William Burns i cili po zhvillon një tur në ballkan, të enjten ishte për vizitë në Kosovë, shkruan Gazeta Enigma.
Takimi në Kosovë pasoi pas atij që kishte në Bosnje dhe Serbi.
Fillimisht u raportua se të enjten në orët e pasdites se një aeroplan i ushtrisë amerikane, me të cilin besohej se ka udhëtuar shefi i Agjencisë Qendrore amerikane të Inteligjencës (CIA), William Burns, në Bosnje dhe Serbi është parë në Aeroportin Ndërkombëtar të Prishtinës “Adem Jashari”.
Pas kësaj, shefi i CIA-s është parë duke hyrë në Presidencë, ndërsa në oborrin e Presidencës kishte forca të shtuara policore.
Një pjesë e madhe e kryeqytetit në orët e pasdites ishe bllokuar nga forcat policore me ardhjen e Burns.
Drejtori i CIA-s, Williams Burns pas takimit me presidenten Vjosa Osmani, ka shkuar në Agjencinë Kosovare të Inteligjencës.
Asnjë deklaratë nuk u dha nga asnjëra palë me të cilat u takua Burns.
Vizita e Burns në Kosovë ndodhi në një kohë kur qeveria amerikane ka kundërshtuar vendimet për veriun të kryeministrit Albin Kurti.
Ndryshe, para Kosovës Burns qëndroi në Sarajevë e më pas edhe në Beograd, në një linjë vizitash që është duke i bërë shteteve ballkanike. / Gazeta Enigma.
