Federata e Futbollit të Shqipërisë ka reaguar pas kritikave të shumta për ndalimin e interpretimit të këngës ”Mora Fjalë” të Shkurte Fejzës në ndeshjet ndërkombëtare, duke i muhuar spekulimet e tilla.
FSHF tha se nuk censuroi këngën, “për të cilën është shpikur së fundmi e gjithë kjo tollovi pa sens”.
“Ndodh shpesh që edhe rreth lojës tonë të bukur të dëgjojmë të shpiken çështje, edhe kur nuk ka çështje. E përsëri, e pavërteta bëhet përherë virale. Tashmë, mungesa e një kënge është alibia apo shpikja e radhës për të prodhuar pak axhendë debati”, thuhet në reagim.
Federata shqiptare tutje tha se muaj përpara fazës finale të Europianit “Gjermani 2024” zgjodhi, edhe nëpërmjet konsultimit dhe sugjerimeve publike kolonën e saj muzikore “Po ku ka si ti o Shqipëria ime!” (kënga “Rrjedh në këngë e ligjërime” e kënduar nga Vaçe Zela) për të qenë himn i saj dhe slogan në Europian dhe po kështu, më tej edhe këngën “Albania” të Capital T.
“Dhe kjo ishte një zgjedhje siç çdo institucion do të bënte përpara një eventi madhor”.
“Po kështu, kjo këngë simbol dhe e gjithëpëlqyer në çdo truall shqiptar e kudo në botë ku jeton mbarë shqiptaria është pritur po kaq mirë në mbështetje të skuadrës tonë. Ne nuk kemi asnjë tagër të censurojmë, jo këtë këngë muzikore, por asnjë prej shumë të tjerave që këndohen e pëlqehen nga e gjithë shqiptaria në ndeshjet e ekipit kombëtar të futbollit”, tha tutje FSHF-ja.
“Po ku ka si ti o Shqipëria ime!” është edhe brandi që ne zgjodhëm e që na shoqëron me plot pasion në çdo stadium kombëtar e ndërkombëtar ku luajmë. Sikundër natyrisht, edhe plot të tjera nga buqeta muzikore e këngëve në stadiumet tona, një prej të cilave është edhe “Mora fjalë!”. Nuk kemi patur, nuk kemi e as nuk do të kemi kurrë asnjë herë dëshirën të biem në një marrëzi të tillë të shpikur nga hiçi, por, për respekt edhe të kësaj krijimtarie muzikore sollëm edhe ne dy fjalë për… “Mora fjalë”. Nuk ka qenë asnjë herë shqetësimi ynë, por le të mbetet axhendë e shpikjes, si një alibi radhe për të bërë pis atë që do të mbetet e pastër përherë…” është thënë në fund të reagimi. /Gazeta Enigma
