Çmimet e naftës kanë shënuar sërish rritje, ndërsa tensionet e reja mes Shteteve të Bashkuara dhe Iranit po rrisin shqetësimet për prishjen e bisedimeve të paqes dhe mundësinë e ndërprerjes së rrjedhës së naftës përmes Ngushticës së Hormuzit.
Nafta e papërpunuar Brent, referenca globale e tregut të naftës, është rritur me 2.6% duke arritur në 98.50 dollarë për fuçi të mërkurën. Ndërkohë, çmimi i West Texas Intermediate (WTI) është rritur me 2.8%, duke arritur në 96.34 dollarë për fuçi.
Brent aktualisht është mbi 7 dollarë më i lartë krahasuar me mbylljen e së premtes, teksa tregtarët shprehen të shqetësuar se konflikti mund të zgjatet.
“Kemi parë pesimizëm në rritje se një marrëveshje SHBA-Iran për të rihapur Ngushticën e Hormuzit është e afërt”, kanë shkruar analistët e Deutsche Bank në një raport.
Pavarësisht rritjes së çmimeve të naftës, indekset kryesore të Wall Street-it, S&P 500, Dow Jones dhe Nasdaq, kanë shënuar nivele të reja rekord.
“Të tre indekset kryesore tani janë mbyllur në nivele rekord për pesë seanca radhazi, hera e parë që e kemi parë këtë që nga viti 2017”, ka deklaruar Neil Wilson, strateg në bankën Saxo.
Në tregjet e tjera, kontratat e ardhshme të aksioneve amerikane paraqiten të përziera, ndërsa indekset kryesore në Evropë po tregtohen kryesisht në rënie. Në Azi, Nikkei i Japonisë është mbyllur me rritje prej 2.5%, i nxitur nga optimizmi për inteligjencën artificiale dhe masat e reja qeveritare për të adresuar rritjen e çmimeve të mallrave.
