Irani ka ekzekutuar me varje dy burra të akuzuar për spiunazh në favor të Izraelit, ndërsa organizatat për të drejtat e njeriut paralajmërojnë për një rritje të ekzekutimeve të lidhura me çështje të sigurisë kombëtare.
Sipas agjencisë iraniane të lajmeve Mizan, e cila drejtohet nga gjyqësori, Omid Behzad dhe Puria Safvat u ekzekutuan në orët e para të 3 gushtit. Autoritetet iraniane pretendojnë se ata kishin ndihmuar shërbimin izraelit të inteligjencës, Mossad, duke dërguar koordinata, fotografi dhe informacione mbi objekte ushtarake dhe të sigurisë.
Gjyqësori iranian tha se dy të akuzuarit u identifikuan nga Organizata e Inteligjencës e Gardës Revolucionare Islamike (IRGC), ndërsa pretendon se nga ekzaminimi i telefonit të Behzadit u zbuluan prova, përfshirë përdorimin e aplikacioneve si Google Maps për të përcaktuar koordinatat e lokacioneve të ndryshme.
Megjithatë, autoritetet nuk kanë publikuar prova që mbështesin akuzat ndaj Safvatit, ndërsa grupet ndërkombëtare për të drejtat e njeriut kanë ngritur vazhdimisht shqetësime se në Iran përdoren rrëfime të detyruara dhe procedura gjyqësore që nuk respektojnë standardet e një procesi të rregullt ligjor.
Sipas organizatave për të drejtat e njeriut, që nga fillimi i konfliktit mes Iranit, Izraelit dhe Shteteve të Bashkuara është rritur ndjeshëm numri i ekzekutimeve të personave të akuzuar për spiunazh, bashkëpunim me shtete të huaja, “armiqësi ndaj Zotit” (moharebeh) dhe anëtarësim në grupe opozitare.
Ekspertët e Kombeve të Bashkuara, në një deklaratë të 27 korrikut, akuzuan autoritetet iraniane se po përdorin ekzekutimet për të përhapur frikë, për të penguar protestat dhe për të heshtur kundërshtimin politik.
Sipas të dhënave të fundit të verifikuara, deri më tani gjatë këtij viti në Iran janë ekzekutuar 433 persona. Organizatat ndërkombëtare vazhdojnë të shprehin shqetësime serioze për drejtësinë e proceseve gjyqësore, duke përmendur pretendime për rrëfime të detyruara dhe mungesë të garancive për një gjykim të drejtë.
