Sulmuesi 33-vjeçar, Adam Szalai, që mban edhe shiritin e kapitenit në përfaqësuesen hungareze, ka rezultuar pozitiv ndaj koronavirusit në testet e UEFA-s dhe nuk do të mund të luajë pasditen e sotme në “Elbasan Arena”.
Federata Hungareze ka njoftuar se në një test tjetër mbrëmjen e të shtunës, Szalai rezultoi negativ, por për sfidën ndaj Shqipërisë nuk mund të grumbullohet, pasi merren për bazë vetëm testet zyrtare të UEFA-s.
Sulmuesi që vesh fanellën e Mainzit në Bundesligën gjermane është lider i repartit të avancuar te Hungaria, pasi numëron 74 ndeshje dhe 24 gola me përfaqësuesen, teksa ishte titullar edhe mbrëmjen e të enjtes në “Puscas Arena” ndaj Anglisë.
Ndërsa, kuqezinjtë vijnë nga humbja nga Polonia ku u mposhtën me rezultat 4-1 dhe do të kërkojnë një reagim ndaj Hungarisë, ndeshje kjo shumë e rëndësishme sa i përket renditjes në këtë grup.
Ndeshja Shqipëri-Hungari zhvillohet sonte në orën 18:00.
