Dy pikët e Erjon Kastratit shtatë sekonda pa përfunduar ndeshja ia kanë siguruar Golden Eagle Yllit fitoren e ngushtë ndaj Teutës së Durrësit në gjysmëfinalen e “Final 4” të Ligës Unike. Në duelin e luajtur të mërkurën në palestrën “Karagaçi” në Pejë, ku po organizohet “Final 4”, Ylli triumfoi me rezultatin e ngushtë 84:82.
Ishte Kastrati, ai që ia sigurojë fitoren Yllit pasi në tentimin e fundit dështoi Kyle Beisch. Me këtë fitore të vështirë, Ylli ka kaluar edhe në finale të Ligës Unike. Kastrati ishte ndër më të dalluarit te Ylli. Ai ndeshjen e përfundoi me 22 pikë të shënuara, ndërsa në fitore kontribuuan edhe Mikaile Tmushiq (23 pikë) e Henrik Shirko (17 pikë, 10 kërcime).
Te Teuta, më efikasi ishte Nasir Core me 23 pikë të realizuara por që nuk mjaftuan për të evituar humbjen. Në fakt, Ylli është kampion në fuqi i Ligës Unike dhe në finale të këtij edicioni do të luajë me fituesin e gjysmëfinales tjetër ndërmjet Pejës dhe Prizrenit-16.
“Final 4” i Ligës Unike ka nisur të mërkurën, ndërsa do të mbyllet të enjten me ndeshjen për vendin e tretë dhe duelin final.
