Pas raportimit nga ministri i Punëve të Brendshme, rreth arrestimit të një zyrtari policor, pasi që kishte dëmtuar fakte nga aksioni i djeshëm në laboratorin e drogës në veri të Kosovës, Inspektorati Policor i Kosovës, del me një njoftim, shkruan GazetaEnigma.
IPK ka njoftuar se se është arrestuar një zyrtar policor në Drejtorinë Rajonale të Mitrovicës së Veriut, me dyshimin se i njëjti ka kryer veprën penale “Keqpërdorim i detyrës zyrtare apo autoritetit” dhe “Manipulim me prova”.
Përmes një komunikate të lëshuar për media IPK-ja ka pranuar informacione se zyrtari policor dyshohet se ka dëmtuar disa kamera të sigurisë dhe pajisje të tjera në afërsi të vendit të ngjarjes ku është zhvilluar operacioni antidrogë në veri.
/ GazetaEnigma
Komunikata e plotë:
IPK arrestoi një zyrtar policor të dyshuar për keqpërdorim të detyrës zyrtare dhe manipulim me prova
Prishtinë/Mitrovicë e Veriut, 24 maj 2022,
Inspektorati Policor i Kosovës respektivisht hetuesit e Departamentit të Hetimeve kanë arrestuar sot një zyrtar policor në Drejtorinë Rajonale të Mitrovicës së Veriut me dyshimin se i njëjti ka kryer veprën penale të “Keqpërdorim i detyrës zyrtare apo autoritetit” dhe “Manipulim me prova”.
Inspektorati Policor sot në orët e pasdites përmes rrugëve operative kishte pranuar informacione se ky zyrtar policor dyshohet se ka dëmtuar disa kamera të sigurisë dhe pajisje të tjera në afërsi të vendit të ngjarjes ku është zhvilluar dje operacioni i përbashkët anti-drogë i policisë dhe doganës në fshatin Izvor të Zveçanit.
Pas pranimit të këtyre informacioneve, hetuesit e IPK-së në koordinim me prokurorinë kanë ndërmarrë veprime hetimore pas të cilave zyrtari policor i dyshuar në këtë rast është arrestuar sot në mbrëmje kurse nga prokurori kompetent i është caktuar masa e ndalimit për 48 orë .
Hetuesit e IPK-së në koordinim të plotë me Prokurorinë e Shtetit, do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast.
