Siç është raportuar, para pak minutave, në vrasjen që ndodhi te ‘Rruga C’ në Prishtinë, një person është privuar nga jeta, duke u qëlluar me kallashnikov. Viktima nuk ka arritur t’iu mbijetojë plagëve dhe ka vdekur, teksa Policia njoftohet se ka dalë në vendin e ngjarjes.
Burimet e Sinjalit kanë bërë me dije se personat që dyshohen të jenë përfshirë në këtë rast kanë arritur të ikin, ndërsa vetura e tyre është gjetur jo shumë larg vendit të ngjarjes.
Të dyshuarit ia kanë vënë flakën veturës në mënyrë që të zhdukin gjurmët e tyre, thonë të njëjtat burime.
Rasti tashmë është konfirmuar edhe nga Policia e Kosovës.
“Sot rreth orës 20:00, është raportuar për gjuajtje me armë zjarri të ndodhur në rrugën “C” në Prishtinë.
Policia ka dalë në vendin e ngjarjes dhe nga informacionet e para të marra nga mjekët emergjent është konfirmuar se një person është pa shenja jete.
Policia po vijon punën me veprime të ekzaminimit të vendngjarjes si dhe me veprime të tjera operativo-hetimore me qëllim identifikimin dhe lokalizimin e të dyshuarve të implikuar në rast.”
