Jo rrallëherë prindërit përfundojnë në pranga për shkak të keqtrajtimit që ua bëjnë fëmijëve. Në shumicën e këtyre rasteve, viktima janë të miturit, ndaj të cilëve ushtrohet dhunë fizike e psikike.
Për një rast të tillë, ka rënë në pranga dje një burrë në Graçanicë.
Burimet e Gazetës Sinjali brenda Prokurorisë bëjnë me dije se rasti është zbuluar pasi është raportuar nga drejtori i shkollës ku vajza e mitur vijon mësimet.
Bazuar në dëshminë e vajzës, babai i saj e ka goditur dhe ia ka thyer telefonin e saj mobil. Si pasojë e dhunës së përjetuar, ajo ka marrë lëndime trupore dhe ka kërkuar ndihmë mjekësore në spital.
Ndërkohë i dyshuari është arrestuar dhe është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që i dyshuari të dërgohet në mbajtje dhe i njëjti do të hetohet nën dyshimet për kryerjen e veprës penale ‘Dhunë në familje’.
