Ministri i Infrastrukturës, Liburn Aliu, ka deklaruar mbrëmë se përfundimisht autostrada e Dukagjinit nuk do të bëhet.
Lidhur me këtë, reagoi sot ish-deputeti Daut Haradinaj, i cili në llogarinë e tij në Facebook shprehet se Dukagjini nuk e duron, siç tha, injorimin që i bëhet nga Qeveria Kurti.
“Sot rrugës për Dukagjin, më saktësisht për në Deçan, u desht 1 orë e 45 minuta për të bërë rrugë, pasi që i mungon infrastruktura e nevojshme kësaj ane. Qeveria deklaroi se rreth 600 mijë qytetarë nuk do të kenë autostradë. A thua kjo zonë nuk është Kosovë, apo nuk janë taksapagues të Kosovës. Pse i ndëshkoni këta njerëz!?”
“Shumë shpejt do të vie dita të dilni para popullit dhe shpresoj që do t’iu përgjigjen ashtu siç po i trajtoni. Dukagjini nuk e duron injorimin tuaj z. Ministër” ka shkruar Daut Haradinaj në reagim.
