Instituti Kombëtar i Shëndetit Publik të Kosovës (IKShPK), ka kërkuar nga qytetarët që të kenë kujdes gjatë kësaj jave të mos ekspozohen shumë në diell shkaku i temperaturave të larta.
IKSHPK ka thënë se temperaturat e larta ndikojnë negativisht në organizmin e njeriut sidomos te të moshuarit.
“Duke u ekspozuar në diell për një kohë të gjatë mund të pësojmë goditje nga të nxehtit që çon në dehidrim të organizmit përcjellur me ngërçe, vjellje, çrregullime diarreike, skuqje dhe djegie të lëkurës duke komplikuar sistemin kardiovaskular deri në insufiçiencë renale”, thuhet në njoftim.
IKSHPK ka prezantuar edhe disa masa mbrojtëse për shëndetin e personave të moshuar gjatë ekspozimit ndaj temperaturave të larta të ajrit mbi 30°C, posaçërisht për të moshuarit me sëmundje kardiovaskulare dhe sëmundje tjera kronike.
