Qeveria e Kosovës ka njoftuar se Këshilli i Sigurisë ka miratuar masa shtesë për të forcuar sigurinë rreth objekteve dhe shërbimeve kritike në vend, përfshirë ura, trafostacione, antena, liqene dhe kanale.
Në njoftimin e Qeverisë thuhet se këto masa do të përfshijnë aktivizimin e Policisë së Kosovës dhe Forcës së Sigurisë së Kosovës në terren për të siguruar mbrojtjen e këtyre objekteve strategjike, shkruan Gazeta Enigma.
Po ashtu, është theksuar se është intensifikuar bashkëpunimi ndërinstitucional dhe ai ndërkombëtar, me qëllim parandalimin e sulmeve të ngjashme në të ardhmen. Kjo masë vjen si përgjigje ndaj rrezikëve të sigurisë dhe për të ruajtur stabilitetin e infrastrukturës kritike të Kosovës.
“Në orët e para të mëngjesit të sotëm, me fillim në 01:30, nën udhëheqjen e Kryeministrit të Republikës së Kosovës, Albin Kurti, u mbajt një mbledhje e jashtëzakonshme e Këshillit të Sigurisë së Republikës së Kosovës. Kjo mbledhje u thirr pas sulmit të tretë në 72 orët e fundit, që këtë herë ka shënjestruar infrastrukturën kritike të vendit – sistemin e furnizimit me ujë dhe prodhimin e energjisë elektrike. Indikacionet e para sugjerojnë se ky sulm i radhës është orkestruar nga shteti serb, i cili ka kapacitete për një sulm të këtillë kriminal e terrorist. Elemente të organizatave terroriste “Mbrojtja Civile” e “Brigada Veriore” dhe kryekrimineli Millan Radoiçiq nën dirigjimin e Presidentit dhe Qeverisë së Serbisë planifikojnë e ushtrohen në Serbi për sulme të këtilla profesioniste”.
“U vu në pah edhe ndërlidhja e gjasshme me sulmet e Rusisë agresore në Ukrainë mbi kapacitetet energjetike gjatë kësaj jave duke lënë mbi një milion amvisëri ukrainase pa energji elektrike pikërisht në prag të dimrit. Gjatë mbledhjes, anëtarët e Këshillit diskutuan masat emergjente që janë marrë dhe po ndërmirren për të zbutur pasojat e sulmit dhe për të garantuar sigurinë e infrastrukturës kritike në vend. Janë ndërmarrë hapa konkretë për të rikthyer situatën në normalitet duke siguruar qytetarët se furnizimi me ujë dhe energji elektrike do të rregullohet sa më shpejt”.
“Për më tepër, Këshilli i Sigurisë ka aprovuar masa shtesë për të forcuar sigurinë rreth objekteve dhe shërbimeve kritike si ura, trafostacione, antena, liqene, kanale etj. Policia e Kosovës dhe Forca e Sigurisë së Kosovës do të aktivizohen në terren për këtë qëllim. Po ashtu është intensifikuar bashkëpunimin ndërinstitucional dhe ai ndërkombëtar për të parandaluar sulme të ngjashme në të ardhmen”, thuhet në njoftimin e Qeverisë./GazetaEnigma/
