Takimet e krerëve institucional me ministrin grek, e më pas edhe sinjalizimet se Kosova mund ta njihet nga Greqia, ngjallën reagime se një gjë e tillë do të ndodhë shumë shpejtë, shkruan Gazeta Enigma.
Mirëpo, ish-ambasadori në Slloveni, Anton Berisha tha për Gazetën Enigma se Greqia ka një qëndrim më relaksues nga pesëshja që nuk e ka njohur Kosovën dhe nuk ka masa penguese në asnjë nivel.
Sa i përket njohjes, Berisha theksoi se duhet krijuar një kontekst i ri, që sipas tij varet edhe nga raporte multilaterale.
“Greqia ka një qëndrim më relaksues nga peseshja që nuk e ka njohur Kosovën dhe nuk ka masa penguese në asnjë nivel. Sa i perket njohjes, një kontekst i ri duhet krijuar, që varet edhe nga raporte multilaterale dhe mbetet ta shohim”.
Mes tjerash, Berisha thotë se “me Greqinë që nga vitet e 90-ta ka pasur shkëmbime vizitash të nivelit të lartë, duke filluar nga dr.Rugova e deri ne ditet e sotme”.
“Marrëdhëniet Kosovë-Greqi po afrohen ditë e më shumë“
Ministri i Jashtëm grek, Nikos Dendias, zhvilloi takim me presidenten e Kosovës, Vjosa Osmani, ku biseduan për marrëdhëniet mes dy vendeve.
Nga ky takim, Osmani i bëri thirrje Greqisë të formalizojë njohjen e pavarësisë së Kosovës.
Mes tjerash, Osmani i kërkoi ministrit Dendias të mbështesë përpjekjet e Kosovës për anëtarësim në Këshillin e Evropës dhe në NATO.
Në vazhdën e takimeve Dendias bisedoi edhe me kryeministrin e Kosovës, Albin Kurti.
Nga ky takim, Kurti tha se marrëdhëniet Kosovë-Greqi po bëhen gjithmonë e më të ngushta.
“Marrëdhëniet e Kosovës me Greqinë po afrohen çdo ditë e më shumë. Është një dëshmi e marrëdhënieve tona të mira dypalëshe, por edhe një njohje e vlerave tona të përbashkëta të lirisë dhe demokracisë. Kënaqësi të pres për një darkë mbrëmë ministrin e Jashtëm të Greqisë Niko Dendias”, shkroi Kurti në Twitter.
Në vazhdën e bisedimeve, kryeparlametari i Kosovës, Glauk Konjufca u takua edhe me presidentin e Greqisë, Konstantinos Tasoulas.
“Pas takimit me presidentin e Greqisë, u binda që njohja nuk është shumë e largët e këtij shtet për Republikën e Kosovës”, tha Konjufca, duke theksuar më tej edhe raportet mes Kosovës dhe Greqisë.
“Sa i përket relacioneve ndërshtetërore ne me Greqinë kemi relacione gjithçka përmos formalizimit të njohjeve. Pra nëse e sheh se si ata pranojnë edhe institucionet dhe ata përfaqësuesit shtetëror më të rëndësishëm të shtetit të Greqisë vijnë në Kosovë dhe ne i presim me pritje shtetërore, me të gjitha procedurat që i ka pritja shtetërore dhe këtë nuk e kanë problem si përfaqësues të institucioneve të Greqisë”.
“Në anën tjetër e kemi zyrën tonë, që në çdo aspekt funksionon si Ambasadë përveç që nuk quhet Ambasadë dhe pastaj kjo implikon edhe disa le të themi, pasoja tjera, mirëpo edhe ata e kanë përfaqësuesin e tyre në Kosovë të cilit ne i themi Ambasador, ata nuk e quajnë ambasador por ne kështu i themi për shkak se e dijmë që një ditë do të kemi Ambasadën dhe të gjitha këto, gjithmonë përpiqemi që nëpërmjet bashkëpunimit, përmes afrimit në mes të shteteve tona të vijmë deri te hapi i fundit e që është njohja formale e Republikës së Kosovës nga ana e Greqisë”, tha Konjufca.
Për avansimin e raporteve mes Greqisë dhe Kosovës, kanë reaguar edhe nga Serbia, derisa kreu i Kuvendit Ivica Daçiq ka falënderuar Greqinë për pozicionin që shteti helen mban ndaj Republikës së Kosovës dhe për “mbështetjen” që Greqia ia jep Serbisë sa i përket çështjes së Kosovës.
Ndryshe, vlen të theksohet se Greqia është një nga pesë e Bashkimit Evropian që nuk e njeh pavarësinë e Kosovës. /Gazeta Enigma/.
