Kryeministri i Kosovës, Albin Kurti, ka deklaruar se gjatë takimit me sekretarin e shtetit për punë të jashtme të Mbretërisë së Bashkuar, David Lammy, dhe të dërguarën e posaçme për Ballkanin Perëndimor, Karen Pierce, ka shprehur gatishmërinë e Kosovës për të bashkëpunuar në organizimin e Samitit të Procesit të Berlinit, i cili pritet të mbahet këtë vit nën drejtimin e Mbretërisë së Bashkuar.
Në këtë takim, Kurti ka theksuar se janë trajtuar çështje të rëndësishme, përfshirë aspiratat e Kosovës për anëtarësim në NATO, Bashkimin Evropian dhe Këshillin e Evropës., shkruan Gazeta Enigma.
Ai ka vënë në pah progresin demokratik dhe zhvillimin ekonomik të arritur gjatë mandatit të tij qeverisës, si dhe prioritetet strategjike të Republikës së Kosovës në rrafshin ndërkombëtar.
“Biseduam mes tjerash për progresin demokratik dhe zhvillimin ekonomik që ka njohur vendi ynë gjatë këtij mandati qeverisës dhe objektivat e synimet parësore të Republikës së Kosovës për anëtarësim në NATO, Bashkim Evropian dhe në Këshillin e Evropës. Gjithashtu, i urova edhe për pritjen e Samitit të Procesit të Berlinit këtë vit nga ana e Mbretërisë së Bashkuar e për të cilën ofrova bashkëpunimin tonë për ta bërë këtë samit sa më të suksesshëm”, ka shkruar Kurti në Facebook.
