Kryeministri i Kosovës, Albin Kurti, dhe ministri i Mbrojtjes, Armend Mehaj, këtë të diel janë takuar me pilotët e Kompanisë së Helikopterëve të Gardës Kombëtare të Forcës së Sigurisë së Kosovës.
Tre pilotët e kësaj kompanie që ishin prezent në këtë takim janë, toger Afrim Zabelin, toger Krenar Vocën, dhe toger Atdhe Hasanin.
Pjesë e takimit ishte edhe nëntoger Sunaj Shala, I specializuar për monitorim dhe orientim ajror, dhe dy inxhinierë të helikopterit, rreshter Behar Zeqirin dhe rreshter Labinot Gashin.
Kurti i falënderoi ata për kontributin dhe rolin që kanë pasur deri tani dhe që do ta kenë edhe në të ardhmen në avancimin e Kompanisë së Helikopterëve të FSK-së.
Ai theksoi se Ushtria e Kosovës është në fillet e gjinisë së aviacionit dhe se avancimin e sheh të rëndësishëm edhe për nevoja ushtarake, por edhe për ato shtetërore.
“Shkollimi dhe pajisjet janë të rëndësishme, dhe do të investojmë si shtet në të dyja”, shtoi ai.
Ndërsa pilotët i treguan kryeministrit për shkollimin që kanë kryer, për sfidat që kanë pasur e që i kanë.
Tre pilotët janë specializuar në Akademinë Ushtarake në Turqi, ashtu sikurse edhe dy inxhinierët e helikopterit, ndërsa nëntogeri Shala ka specializuar për monitorim, orientim, udhëzim e radar në Akademinë Ushtarake të Kroacisë “Dr.Franjo Tugjman”./Gazeta Enigma/
