Kryeministri Albin Kurti ka publikuar një letër që ia kishte dërguar kryetares së Gjykatës Speciale, Ekaterina Trendafilova, më 2022.
Në letër, Kurti kishte kërkuar lirimin e Hashim Thaçit, Kadri Veselit, Jakup Krasniqit dhe Rexhep Selimit, deri në verdiktin përfundimatar.
Kurti i bëri thirrje Trendafilovës që kjo gjykatë të mos fokusohet tek vetëm një etni, pra ajo shqiptare, por edhe tek serbët.
“Nëse Gjykata Speciale është krijuar për të adresuar krimet e luftës, pse nuk po hetohen krimet e tmerrshme në Prekaz? Ose masakra e Mejës, masakra e Reçakut dhe qindra maskara , në të cilat mijëra shqiptarë u vranë, u dogjën dhe më pas u hodhën në varreza masive?”, shkroi Kurti në letër.
“Ne besojmë se të akuzuarit mund të kthehen në shtëpi dhe të presin gjykimin, pasi Policia e Kosovës ka garantuar se mund të menaxhojë arrestin shtëpiak të tyre”, thuhet tutje në letër.
“Menjëherë pasi që kishte vënë lule të freskëta te varri i Astrit Deharit, më 5 nëntor 2020, Rexhep Selimin e dërguan në burgun e Hagës ku ende po e mbajnë. Përveç tij, edhe Hashim Thaçi, Kadri Veseli dhe Jakup Krasniqi po ndodhen në paraburgim tash e pesë vjet. Pesë vite pritje, pesë vite pas hekurave ndërkohë që arsyeja e njëjtë përsëritet në çdo vendim për refuzimin e lirimit: “rreziku i ndikimit mbi dëshmitarët”. Por Prokuroria e ka përfunduar rastin e saj. Dëshmitarë më nuk ka. Nuk ka as arsye ligjore, as morale që të mbahen edhe më tej në paraburgim”, shkroi Kurti në një postim.
“Kështu kam menduar që nga dita e parë. Kemi punuar gjatë dhe me përkushtim për këtë çështje, në heshtje, sepse shpesh puna e mirë bëhet pa zhurmë. Por ndonjëherë puna që nuk shihet, nuk dihet. Si Kryetar i Lëvizjes VETËVENDOSJE! e si deputet prej vitit 2014 bashkë me Rexhën i patëm paraqitur të gjitha argumentet e qëndrimet për këtë Gjykatë që është sot duke gjykuar”.
“E si Kryeministër, zyra ime dhe unë kemi kërkuar lirimin e tyre që nga fillimi. Në vijim po bashkëngjes letrën që i është dërguar drejtpërdrejt znj. Trandafilova në lidhje me këtë çështje në shtator të vitit 2022. E bëj publike sot për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve të tyre, dhe ta mbrojnë në liri luftën e drejtë çlirimtare të Kosovës. Përgjigja e znj. Trandafilova pas dy javësh që mori letrën nga unë nuk ndryshoi gjë. Kërkesat e paraqitura nuk morën zgjidhje”.
“Kërkesat tona qëndrojnë akoma, e në Kosovë ekzistojnë të gjitha garancitë për përgjigje pozitive ndaj tyre”, shkroi më tej Kurti.
