Fituesi i zgjedhjeve të 28 dhjetorit, Albin Kurti, ka shkruar për këtë rezultat të bindshëm, duke thënë se “puna vazhdon” dhe se “siguria e begatia do të shtohen”.
“Në dhjetë ditë fushatë, dhjetëra mijëra duar të shtrënguara e mijëra dyer të hapura nga ju në qindra takime e tubime anembanë. Na pritët me ngrohtësi e besim, e për këtë ju falënderoj përzemërsisht. Jeni shumë, madje aq shumë sa shumicës nuk ua njohim e dimë emrin. Dhe, u angazhuat pa kursim për fitoren e VETËVENDOSJE!-s me partnerë, për fitoren tuaj”, shkroi Kurti.
“Të dashur bashkatdhetarë që erdhët nga Evropa, Amerika e nga çdo cep i botës, ose që votuat me postë apo fizikisht pardje në ambasadat e konsullatat tona, u jemi mirënjohës përjetë për kontributin tuaj të pamatshëm për liri e shtet dhe komb, si dhe për përkrahjen vendimtare që e bëri fitoren në këto zgjedhje aq madhështore saqë historike”, u shpreh tutje ai.
“Puna vazhdon, siguria e begatia do të shtohen. Na priftë e mbara!”, përfundoi Kurti.
