Kryeministri i Kosovës, Albin Kurti, pas takimit me kancelarin e Austrisë, Karl Nehammer, ka thënë se presidenti rus Vladimir Putin mund ta shpërndajë luftën edhe diku tjetër pasi nuk mund të ulet në tryezën e negociatave vetëm për shkak të luftës në Ukrainë, shkruan Gazeta Enigma.
“Putini gjatë luftës sonë, ka përmendur Kosovën vetëm një herë në muaj. Ndërsa tani e përmend pothuajse çdo ditë duke tërhequr paralele fallse me Krimenë”, tha Kurti.
Sipas tij, Putini kundërshtoi ndërhyrjen shpëtimtare të NATO-s më 1999, dëshiron ta keqpërdor rastin e Kosovës për ta ushtruar hegjemoninë e vet.
“Jemi të brengosur, por jo të frikësuar”, shtoi ai.
“Populli është bashkë dhe aleanca jonë me BE-në, SHBA-në e NATO-n është e pashkëputshme. Presidenti rus dëshiron të ulet në tryezën e negociatave, jo me Zelenskyn, por me Bidenin”.
Kurti ka theksuar se “për këtë qëllim, unë kam drojën që do ta intensifikojë luftën në Ukrainës, por edhe ta shpërndajë atë diku tjetër sepse ai nuk mund të ulet dot në tryezën e negociatave vetëm me luftën në Ukrainë”.
“Ballkani Perëndimor është në rrezik, megjithatë këtu veçse po bëhet lufta hibride”.
“Në Nish, është Qendra Humanitare ruse, e cila është mbushur me plotë agjentë rusë. Por ne brengosemi, por s’jemi të frikësuar”, ka thënë Kurti të premten në konferencën për shtyp me kancelarin austriak”.
“Por edhe nëse, largqoftë, do të ketë ndonjë ekses, ne nuk do ta lejojmë të ndodhë”, përfundoi Kurti. /Gazeta Enigma/
