Udhëheqësi suprem i Iranit, Ajatollah Ali Khamenei, deklaroi se Shtetet e Bashkuara kanë treguar qartë se qëllimi i tyre përfundimtar është dorëzimi i Iranit.
“Trump e tregoi të vërtetën, e bëri të qartë se amerikanët do të jenë të kënaqur vetëm me dorëzimin dhe disfatën e Iranit – dhe asgjë më pak,” tha ai, duke iu referuar një postimi të presidentit Donald Trump në rrjetet sociale javën e kaluar, ku kërkohej “DORËZIMI I PAKUSHTËZUAR” i Republikës Islamike.
Khamenei theksoi se SHBA ka pasur një “problem themelor” me regjimin iranian që nga Revolucioni Islamik i vitit 1979, duke shtuar se Uashingtoni për vite me radhë i ka fshehur qëllimet e veta duke përdorur arsye të ndryshme si “të drejtat e njeriut, pastaj të drejtat e grave, pasurimi bërthamor, programi bërthamor thelbësor dhe më pas prodhimi i raketave”.
“Por me deklaratën e tij, ai zbuloi të vërtetën, tregoi qëllimin real,” tha Khamenei për Trump. “Presidentët e mëparshëm nuk e kanë thënë këtë, sepse është e papranueshme dhe e palogjikshme t’i thuash një kombi të dorëzohet.”
“Vijnë me justifikime të ndryshme, por në thelb ata duan dorëzimin e Iranit,” përfundoi ai.
