Parc des Princes e priti Kylian Mbappen mes fishkëllimave në fillim të sezonit, por me kalimin e kohës përfundoi duke u duartrokitur, pothuajse si një lutje që ai të rinovonte. Megjithatë, lojtari ende nuk flet hapur për të ardhmen e tij.
Më pak se një muaj para se të negociojë me kë të dojë, francezi nuk sqaron se çfarë do të bëjë. “E ardhmja ime? Nuk është e lehtë. Çfarëdo që të ndodhë, unë do të luaj për një klub të madh”, deklaroi ai në një intervistë për Amazon Prime.
Mbappe pranoi disa javë më parë se u përpoq të shkonte te Real Madridi në verë, por Emiri i Katarit dhe presidenti Al Khelaifi e penguan atë. “Njerëzit më pyesin nëse kjo situatë më zhgënjeu. Pak, sidomos në fillim”, përsëriti ai.
Megjithatë, futbollisti nuk mund të përballet me asnjë pengesë. Angazhimi i tij ndaj PSG-së nuk lë asnjë dyshim: “Unë jam parisien dhe e dua klubin”. 7-shi është mirënjohës ndaj klubit, por ka thënë në më shumë se një rast se dëshiron të jetojë përvoja të tjera.
Real Madridin e ka në mendje që në fëmijëri. Dhe propozimi i Florentino Pérez nuk ka skaduar, as nuk do të skadojë. Santiago Bernabeu po përgatitet të ketë një lojtar që dëshiron të largohet nga Parisi.
Idealisht do të ishte të largohej me Ligën e Kampionëve të fituar, për të cilën klubi parisien po shpenzon pa fund prej vitesh. Rruga është e gjatë dhe e ndërlikuar, por askush nuk do të dorëzohet. PSG nuk po kalon momentin më të mirë, duke u kritikuar shumë, sepse nuk është mjaft bindës.
“Nuk mund të fshihemi. Jemi të vetëdijshëm se duhet të bëjmë më shumë, meqë kemi lojtarë të këtij niveli”, komenton Mbappe. Me Messin dhe Neymarin në krahë, Kylian nuk ndihet si lideri i grupit. “A jam unë shefi? Nuk ka rëndësi. Synimi është që ne të tre të jemi në gjendje të mirë”.
Në çdo rast, Mbappe donte të theksonte se askush nuk shërben më shumë se ai te PSG: “Unë jam asistuesi më i mirë në Ligue 1, por edhe në Ligën e Kampionëve. Kjo tregon se nuk jam egoist, që mendoj vetëm për të shënuar. Gjithsesi, e di që duhet të bëj më mirë”.
